Тошкент шаҳар ҳокимлиги раҳбарлиги ва ҳомийлигида пойтахтимиз ҳудудидаги тарихий ва замонавий жой номларини илмий асосда жамлаган «Тошкент шаҳри жой номларининг изоҳли луғати» китоби тақдимоти бўлиб ўтди.

🔵 Тақдимот давомида тарих фанлари доктори, профессор Омонулло Бўриев ҳамда тарих фанлари доктори Хайрия Бўриева, шунингдек бошқа иштирокчилар томонидан мазкур нашрнинг илмий-амалий аҳамияти, топонимика соҳасидаги ўрни ва пойтахт жой номларини тизимли ўрганишдаги аҳамияти юзасидан маърузалар қилинди.

Мазкур изоҳли луғат Тошкент шаҳрининг бой тарихий мероси ва бугунги замонавий қиёфасини акс эттирган бўлиб, у икки қисмдан — «Тарихий Тошкент» ва «Замонавий Тошкент» бўлимларидан иборат. Унда ариқлар ва каналлар, даҳа ва дарвозалар, туманлар, маҳаллалар, метро бекатлари, қабристон ва зиёратгоҳлар каби жой номларининг илмий ва халқона талқинлари келтирилган.

🧑‍💻 Тақдимот якунида мазкур нашрни тайёрлашда хизмат қилган муҳаррир ва тузувчиларга Тошкент шаҳар ҳокими номидан ташаккурномалар топширилди.