Toshkent shahar hokimi Shavkat Umurzakov Vision Invest kompaniyasi prezidenti va bosh direktori Omar Al Midani boshchiligidagi vakillari bilan uchrashdi.

Uchrashuvda nafaqat Toshkent shahri, balki butun O‘zbekiston Respublikasining ishonchli hamkori va yaqin do‘sti sifatida qaralayotgan Saudiya  tomoni bilan hamkorlikning joriy darajasiga yuqori baho berildi. Tomonlar o‘rtasidagi iliq va ishonchli munosabatlar alohida ta’kidlandi.

Suhbatdoshlar O‘zbekiston va Saudiya Arabistoni o‘rtasidagi 1992-yilda o‘rnatilgan diplomatik aloqalar so‘nggi yillarda sifat jihatidan yangi bosqichga ko‘tarilganini qayd etishdi. Hamkorlik amaliy tus olib, aniq loyiha va tashabbuslar orqali amalga oshirilmoqda. Erishilgan sheriklik va ishonch darajasi boshqa davlatlarda ham qiziqish va hurmat uyg‘otayotganiga ishonch bildirildi.

Saudiya kompaniyalarining O‘zbekistondagi, xususan energetika va aviatsiya sohalaridagi muhim loyihalarni amalga oshirishdagi ishtirokiga alohida e’tibor qaratildi. Bunda hamkorlikning asosiy omili sifatida investitsiyalar hajmi emas, balki o‘zaro ishonch va strategik yaqinlikning yuqori darajasi ta’kidlandi.

Uchrashuv doirasida O‘zbekiston Respublikasi Prezidenti tashabbusi bilan investorlar uchun yaratilgan sharoit va imkoniyatlar, shuningdek, yo‘l infratuzilmasi, mehmondo‘stlik va turizm, chiqindilarni qayta ishlash hamda suvni tozalash sohalaridagi amalga oshirilayotgan va istiqbolli yirik loyihalar haqida ma’lumot berildi.

Bundan tashqari, uchrashuv ishtirokchilari "Yangi avlod" MIZ  faoliyati va unda investitsiya loyihalarini amalga oshirish hamda tadbirkorlik faoliyatini yuritish uchun yaratilgan qulay shart-sharoitlar bilan tanishtirildi.