Toshkent metropolitenida yo‘l haqini kaft orqali to‘lash tizimi joriy etildi.

Endi metroga kirish uchun transport kartasi yoki smartfon kerak emas – to‘lov kaftdagi tomir chiziqlari asosida biometrik identifikatsiya yordamida amalga oshiriladi.

Hozirgi kunda 49 ta bekatda innovatsion tizim o‘rnatilgan. Undan kuniga taxminan 20-25 ming yo‘lovchi foydalanmoqda. Ro‘yxatdan o‘tish jarayoni atigi 5 daqiqa vaqt oladi.

Mutaxassislarning fikricha, ushbu texnologiyani joriy etish navbatlarni sezilarli darajada qisqartirish va yo‘lovchilarning vaqtini tejash imkonini beradi.

Ta’kidlash joizki, bunday yechimlar shahar va uning infratuzilmasiga bo‘lgan ishonchning ko‘rsatkichidir. Toshkentda fintex tashabbuslarini rivojlantirish uchun barqaror va xavfsiz muhit izchil ravishda shakllantirilmoqda. Bu esa investorlarning faol ishtirokida yuqori texnologiyali va keng ko‘lamli yechimlarni amalga oshirishda o‘z aksini topmoqda.

Videoda yo‘l haqini kaft orqali to‘lash qanday ishlashi ko‘rgazmali tarzda namoyish etilgan.