Aziz yurtdoshlar!

Toshkent shahar hokimligi barchangizni O‘zbekiston Respublikasi Mustaqilligining 34 yilligi munosabati bilan samimiy muborakbod etadi! 

🇺🇿Mustaqillik — xalqimiz tarixidagi eng yorqin sahifa, eng buyuk ne’matdir. 34 yil oldin qo‘lga kiritilgan ozodlik tufayli milliy davlatchiligimiz tiklandi, xalqimiz o‘z taqdirini o‘zi belgilash huquqiga ega bo‘ldi. Bu yillar davomida yurtimizda tinchlik va barqarorlik qaror topdi, jamiyatimiz hayotining barcha sohalarida salmoqli ishlar amalga oshirildi.

Mustaqillik yillarida, ayniqsa, Yangi O'zbekistonda poytaxtimiz Toshkent yangi qiyofa kasb etib, zamonaviy infratuzilma, obodlik va bunyodkorlik ishlari natijasida mintaqaning eng yirik va go‘zal shaharlaridan biriga aylandi. 

Bugun muhtaram Prezidentimiz boshchiligida amalga oshirilayotgan islohotlar tufayli Vatanimiz, xususan, poytaxtimiz Toshkent shahrida taraqqiyot va yangilanish jarayonlari izchil davom ettirilib, shahrimiz yanada gurkirab rivojlanmoqda. Bu yo‘lda mehnat qilayotgan fidoyi yurtdoshlarimizning sa’y-harakatlari, mehnatlari ham alohida e'tirofga loyiq. 

Shu ulug‘ kunda Toshkent shahar hokimligi Vatan ravnaqi va xalq farovonligi yo‘lida o‘z mehnatini ayamagan barcha yurtdoshlarimizga chuqur minnatdorlik bildiradi.

Mustaqillik bayrami barchamizga yangidan-yangi g‘alabalar va ulkan marralar sari yo‘l ochsin! Mustaqilligimiz abadiy bo‘lsin! 

Hurmat bilan, Toshkent shahar hokimligi