Toshkentda Namangan viloyati xalq deputatlari Kengashi a’zolarining tashrifi bo'lib o'tmoqda

Tashrif dasturi hududlararo hamkorlikni mustahkamlash hamda qonunchilik va vakillik faoliyati sohasida tajriba almashishga qaratilgan.

Dastlab mehmonlar Toshkent shahar hokimligida qabul qilinib, shahar rahbariyati vakillari bilan uchrashuvda bo‘ldilar.

So‘ngra deputatlar Toshkent shahar xalq deputatlari Kengashi kotibiyati faoliyati bilan tanishib, toshkentlik hamkasblari bilan davra suhbatida ishtirok etishdi. Suhbat davomida mahalliy o‘zini o‘zi boshqarish va aholi bilan muloqotning dolzarb masalalari muhokama etildi.

Shuningdek delegatsiyaga hokimlik qoshidagi Raqamli rivojlanish departamenti tomonidan amalga oshirilayotgan poytaxtni raqamlashtirish dasturi taqdim qilindi.

Bundan tashqari mehmonlar O‘zbek Milliy akademik drama teatriga tashrif buyurib, "Er-xotin urushi" spektaklining premyerasini tomosha qilishdi.

Tashrifning birinchi kuni yakunida Yunusobod tumanidagi Shahidlar xotirasi muzeyiga sayohat uyushtirildi.

Tashrif ochiq muloqot va o‘zaro hurmat ruhida kechmoqda, bu esa samarali  hamkorlikni rivojlantirishga xizmat qilmoqda.