«Авиасозлар» бозори одатдаги тартибда ишламоқда. Олиб борилаётган ишлар қонуний асосда фаолият юритаётган савдо расталари ва объектларига дахл қилмайди.

Гап узоқ вақт давомида тартибсиз, ўзбошимчалик билан ташкил этилган савдо мавжуд бўлган бозорга туташ ҳудудда тартиб ўрнатиш ҳақида кетмоқда.

Ушбу ҳудудда айрим фуқаролар мева, сабзавотлар, гўшт маҳсулотлари ва калла-почаларни рухсат берувчи ҳужжатларсиз, жумладан, санитария-эпидемиология талабларини бузган ҳолда сотган. Зарур санитария шароитлари ва маҳсулот сифати назоратининг йўқлиги озиқ-овқат хавфсизлиги учун хавф туғдирарди.

Бундан ташқари, тартибсиз савдо пиёдаларнинг эркин ҳаракатланишига тўсқинлик қилар, транспорт ҳаракатига ҳалақит берар, тирбандликлар, одамларнинг тўпланиши, тартибсиз автотураргоҳлар ва аҳоли, харидорлар ҳамда бозорга ташриф буюрувчилар учун ноқулайликлар туғдирарди.

Шаҳар маъмурияти пойтахтнинг савдо инфратузилмасини замонавий шаҳар талабларига мувофиқ тартибга солиш бўйича изчил ишларни амалга оширмоқда. Ушбу чора-тадбирлардан мақсад нафақат жамоат жойларида, балки бозорлар ҳудудларида ҳам қулай, хавфсиз ва обод шароитларни яратишдир.

Шуни таъкидлаш жоизки, ушбу ҳудудда савдо қилган шахсларга бозор ҳудудидан муқобил, махсус ажратилган ва қонуний жойлар таклиф этилмоқда. Бу жойлар тадбиркорлар учун ҳам, харидорлар учун ҳам янада тартибли ва қулай шароитларни назарда тутади.

Озиқ-овқат маҳсулотлари савдоси фақат санитария шароитлари таъминланган, маҳсулот сифати назорат қилинадиган, харидорлар учун қулайлик ва ҳаракат хавфсизлиги яратилган махсус белгиланган жойларда амалга оширилиши керак.

Ушбу ҳудудда ишлар якунлангач, ҳудудни ободонлаштириш ва кўкаламзорлаштириш, шунингдек, автомобиллар учун тураргоҳ ташкил этиш режалаштирилган. Бу тартибсиз автотураргоҳларни камайтириш, ҳудудга киришни оптималлаштириш ва хавфсиз қилиш, шахсий транспортда ҳаракатланиш учун қулайроқ шароитлар яратиш ҳамда яқин атрофдаги кўчалардаги юкламани камайтириш имконини беради.