Qulay, xavfsiz va tartibli shaharni yaratish — Toshkent shahar hokimligi hamda Yo‘l harakatini tashkil etish markazining asosiy vazifalaridan biridir. Bu boradagi ishlar allaqachon bir necha yo‘nalishda olib borilmoqda: piyodalar uchun mo‘ljallangan joylarni bo‘shatish, bekatlarni tartibga solish, harakat xavfsizligini oshirish, jamoat transportini rivojlantirish va shahar muhiti sifatini yaxshilash.

Bu ishlarning keyingi bosqichi to‘xtash va to‘xtab turish qoidalarining buzilishiga nisbatan qat’iyroq chora ko‘rish amaliyotini joriy etishdan iborat bo‘ladi.

Poytaxtning turli tumanlarida avtomobillarning piyodalar yo‘laklarida, o‘tish joylari yaqinida, bekatlarda, yashil hududlarda, shuningdek, to‘xtash yoki to‘xtab turishni taqiqlovchi belgilar o‘rnatilgan joylarda qoldirilishi holatlari muntazam qayd etilmoqda. Bunday qoidabuzarliklar odamlarning xavfsiz va erkin harakatlanishiga, jamoat transporti, maxsus texnika va boshqa yo‘l harakati qatnashchilarining qatnoviga to‘sqinlik qiladi.

Ayniqsa, bunday vaziyatlar keksalar, bolalar aravachasidagi ota-onalar, nogironligi bo‘lgan shaxslar va bolalar uchun qiyinchilik tug‘diradi.

Shu munosabat bilan, shaharda bunday qoidabuzarliklarga nisbatan yanada qat’iy choralar ko‘rish amaliyotiga o‘tilmoqda. To‘xtash va to‘xtab turish qoidalarini buzgan holda qoldirilgan avtomobillar belgilangan tartibda evakuatsiya qilinib, maxsus jarima maydonchalariga joylashtiriladi.

Ushbu chora-tadbirlarning maqsadi — ko‘chalarda tartibni o‘rnatish, harakat xavfsizligini ta’minlash va shahar muhitining asosiy tamoyilini tiklash: jamoat joylari barcha aholi uchun ochiq, xavfsiz va qulay bo‘lishi kerak.

Haydovchilarni ogohlantiramiz: to‘xtash va to‘xtab turish uchun joy tanlayotganda yo‘l harakati qoidalariga qat’iy rioya qiling hamda avtomobillarni taqiqlangan, piyodalar, jamoat transporti, maxsus texnika harakatiga xalaqit beradigan yoki xavfsizlikka tahdid soladigan joylarda qoldirmang.

Toshkent — aholi uchun qulay shahar. Ko‘chalardagi tartib esa umumiy makonga bo‘lgan hurmatdan boshlanadi.