Qurilish chiqindilari boshqaruvi muhokama etildi

Toshkent shahar hokimligida poytaxt hokimi Shavkat Umurzakovning Buyuk Britaniya eksportni qo‘llab-quvvatlash agentligi (UK Export Finance) yirik korporativ mijozlar va xalqaro yo‘nalish bo‘yicha direktori hamda Biznes guruhi hamraisi Edvard Prins bilan uchrashuvi bo'lib o'tdi.

Ta’kidlanishicha, Toshkent va Britaniya o‘rtasidagi hamkorlikni rivojlantirish O‘zbekiston va Buyuk Britaniya rahbarlarining qat’iy siyosiy irodasi hamda ikki tomonlama aloqalarni, ayniqsa barqaror rivojlanish, yashil iqtisodiyot va zamonaviy texnologiyalar sohalarida mustahkamlashga bo‘lgan o‘zaro intilishi asosida amalga oshirilmoqda.

Uchrashuv davomida tomonlar qurilish chiqindilarini qayta ishlash va poytaxtning chiqindilarni utilizatsiya qilish tizimiga ekologik texnologiyalarni joriy etish sohasidagi hamkorlik istiqbollarini muhokama qildilar.

Ushbu muloqot aholini chiqindilar bilan bog‘liq xizmatlar bilan to‘liq ta’minlash, ularning sifatini xalqaro standartlarga yetkazish, sohaning investitsiyaviy jozibadorligini oshirish bo‘yicha izchil chora-tadbirlarni amalga oshirish doirasida o‘tkazilmoqda. Shuningdek, qayta ishlash darajasini oshirish, chiqindi poligonlarida to‘planishning oldini olish, atrof-muhitga salbiy ta’sirni kamaytirib, aylanma iqtisodiyot doirasida "nol chiqindi" tamoyilini rivojlantirish maqsadlarini ko‘zlaydi.