Shota Rustaveli ko‘chasi rekonstruksiyasining moliyalashtirilishi bo‘yicha tushuntirish

Axborot maydonida Shota Rustaveli ko‘chasini qayta qurish loyihasi ko‘rsatkichlarining noto‘g‘ri talqinini o‘z ichiga olgan ma'lumotlar paydo bo‘lishi munosabati bilan Toshkent shahar hokimligi quyidagi tushuntirishlarni berish zarur deb bildi.

Ba’zi manbalarda keltirilgan 198 million AQSh dollari miqdoridagi summa faqat bitta ko‘chani qayta qurish loyihasiga tegishli emas. Gap transport tarmog‘i va unga tutash hududlarni (piyodalar yo‘laklari, velosipedchilar yo‘laklari, sug‘orish, yoritish, drenaj tizimlari va boshqalar) modernizatsiya qilish bo‘yicha keng qamrovli infratuzilmaviy tadbirlarni o‘z ichiga olgan doiraviy kelishuv haqida bormoqda.  Ushbu hujjat dastlabki xarakterga ega - aniq shartlar, hajmlar, muddatlar va smeta hisob-kitoblari alohida loyiha bloklarini tayyorlash jarayonida aniqlanadi.

Mazkur kelishuv doirasida o'rtacha 50 million AQSh dollariga teng bo‘lgan ishlarning birinchi bosqichi Shota Rustaveli ko‘chasini kompleks qayta qurish, shuningdek, Amir Temur xiyoboni, Shahrisabz ko‘chasi va Olmazor tumanida joylashgan boshqa muhim uchastkalarni yangilashni o‘z ichiga oladi. Yuqorida keltirilgan taqdimot lavhasida bu ishlarning bir qismi ko‘rsatilgan.

Toshkent shahar hokimligi barcha loyihalar amaldagi qonunchilikka qat’iy rioya qilgan holda, shaffoflik va hisobdorlik tamoyillariga amal qilgan holda amalga oshirilayotganini ta’kidlaydi. Barcha dolzarb ma’lumotlar jamoatchilikka muntazam ravishda yetkazib boriladi.