Xalq deputatlari Toshkent shahar Kengashining ellik beshinchi sessiyasi bo‘lib o‘tdi. “Zoom” platformasi orqali tashkil etilgan tadbirda  deputatlar, mutasaddilar va tegishli boshqarmalar rahbarlari ishtirok etishdi. Sessiyada sud-huquq va ijtimoiy-siyosiy faoliyatga oid bir qator masalalar muhokama etildi.  

Oliy Majlisning Inson huquqlari bo‘yicha vakili(Ombudsman)ning  Toshkent shahar mintaqaviy vakili Xurshed Sattarov o‘tgan yili amalga oshirilgan ishlar to‘g‘risida axborot berdi. Ta'kidlanishicha, fuqarolarni qabul qilib, ularning murojaatlarini ko‘rib chiqish ombudsman faoliyatining asosiy yo‘nalishlaridan bo‘lgani bois, Xalq deputatlari shahar Kengashining doimiy komissiyalari, sud va huquqni muhofaza qiluvchi organlar, shuningdek, vazirlik va idoralarning tegishli boshqarmalari bilan yaqin hamkorlik o‘rnatilgan. Umumiy hisobda o‘tgan yili 454 ta murojaat tushgan bo‘lib, ularga tegishli tavsiya, tushuntirish va maslahatlar berildi.

Sessiyada shahar prokurori o‘rinbosari Aliakbar Po‘latov o‘tgan yilning IV choragidagi qonuniylik holati va jinoyatchilik ahvoli yuzasidan hisobot berdi. Qayd etildiki, qonunchilik ijrosi yuzasidan 1 414 ta tekshirish va o‘rganishlar o‘tkazilib, 5 344 ta prokuror nazorati hujjatlari qo‘llanilgan. Natijada 1 195 nafar mansabdor shaxslar intizomiy va ma'muriy javobgarlikka tortildi. Jismoniy va yuridik shaxslarning manfaatlarini ko‘zlab, sudlarga 17 mlrd. 375,2 mln. so‘mlik 240 ta arizalar kiritildi. Qonun buzilishi holatlari yuzasidan 393 ta jinoyat ishi qo‘zg‘atilib, aybdor shaxslarga nisbatan jazo muqarrarligi ta'minlangan. Ko‘rilgan chora-tadbirlar natijasida 3785 nafar shaxsning buzilgan huquqlari tiklangan.