Piyodalar, haydovchilar, poytaxt aholisi va mehmonlari uchun xavfsiz va qulay sharoitlar yaratish maqsadida Toshkent shahar hokimligi, YHTEM, Toshkent shahar IIBB Yo‘l harakati xavfsizligi boshqarmasi, kommunal xizmatlar va hokimlikning boshqa bo‘linmalari hamkorlikda faoliyat yuritmoqda.

Har bir qaror zamirida kompleks muhandislik ishlari yotadi. Mutaxassislar transport va piyodalar oqimini, qatnov qismining kengligini, bekatlar joylashuvini, harakat yo‘nalishlarini, ko‘rish darajasini va ehtimoliy ziddiyatli nuqtalarni o‘rganadi. Ushbu ma’lumotlar asosida muhandislik yechimlari ishlab chiqilib, tahlildan so‘ng loyihalar bosqichma-bosqich amalga oshiriladi.

Bunday tizimli ishlar amalga oshirilayotgan islohotlar va O‘zbekiston Respublikasi Prezidentining PQ-368-son qarori asosida Yo‘l harakatini tashkil etish markazining tashkil etilishi tufayli mumkin bo‘ldi.

Ushbu ishlarning natijalaridan biri — Amir Temur xiyoboni atrofidagi piyodalar harakati sxemasining yangilanishidir.

Amir Temur xiyoboni — Toshkentning asosiy diqqatga sazovor maskanlaridan biri, O‘zbekiston davlatchiligi, milliy tiklanishi va tarixiy xotirasining ramzidir.

Poytaxtga kelgan deyarli har bir mehmon Toshkent bilan tanishar ekan, Amir Temur xiyoboniga tashrif buyuradi.

Biroq uzoq vaqt davomida xiyobonga kirish barcha uchun ham birdek qulay bo‘lmagan.

Ayrim yo‘nalishlarda piyodalar yerosti o‘tish yo‘laklaridan foydalanishga majbur bo‘lgan. Bu, ayniqsa, yoshi ulug‘ fuqarolar, bolalar aravachasi bilan harakatlanayotgan ota-onalar va nogironligi bo‘lgan shaxslar uchun noqulaylik tug‘dirgan. Boshqa joylarda odamlar keng, ko‘p tasmali yo‘lni tartibga solinmagan o‘tish joylari orqali kesib o‘tgan.

Xalqaro anjumanlar saroyi tomonidan xiyobonga olib boruvchi o‘tish joylaridan biri 30 metrdan ortiq edi. Qatnov qismining kengligi piyodalarning yo‘lni tez va xavfsiz kesib o‘tishini qiyinlashtirgan.

Xiyobonga kirishni xavfsiz va qulay qilish maqsadida YHTEM mutaxassislari xorijiy ekspertlar bilan birgalikda piyodalar harakati sxemasini qayta ko‘rib chiqdi.

Endilikda xiyobonga olib boruvchi beshta asosiy yo‘nalishda tartibga solinadigan yerusti piyodalar o‘tish joylari tashkil etildi:

— Xalqaro anjumanlar saroyi tomonidan;
— Temuriylar tarixi davlat muzeyi tomonidan;
— Toshkent kurantlari va Amir Temur shoh ko‘chasi tomonidan;
— Matbuotchilar ko‘chasi tomonidan;
— Sayilgoh ko‘chasi tomonidan.

O‘tish joylarida intellektual svetoforlar o‘rnatildi, «zebra» yo‘l chiziqlari chizildi, eng keng uchastkalarda esa xavfsizlik orolchalari tashkil etildi. Bu piyodalarga yo‘lni bosqichma-bosqich kesib o‘tish imkonini beradi.

Shahar ko‘chalarini tashkil etishga zamonaviy yondashuv uzluksiz, to‘g‘ridan-to‘g‘ri va barcha uchun qulay piyodalar muhitini yaratishni nazarda tutadi. BMT, UN-Habitat tavsiyalari va xalqaro qo‘llanmalarda yerusti o‘tish joylari, ayniqsa, harakatlanish imkoniyati cheklangan shaxslar uchun qulayroq ekani qayd etiladi.

Eng asosiy o‘zgarish shundaki, endilikda odamlar noqulay yerosti o‘tish yo‘lagi bilan keng yo‘lni xavf ostida kesib o‘tish o‘rtasida tanlov qilishga majbur emas. Xiyobonga olib boruvchi asosiy yo‘nalishlarda svetoforlar bilan tartibga solinadigan yerusti piyodalar yo‘nalishi yaratildi.

Yo‘ldagi har bir o‘zgarish ortidagi katta mehnat har doim ham tashqaridan ko‘rinavermaydi. Aslida qarorlardan oldin joylarda o‘lchovlar, datchiklar ma’lumotlari, transport va piyodalar oqimini o‘rganish, kompyuter modellashtirish va muhandislik hisob-kitoblari amalga oshiriladi.

Mazkur videoda nafaqat yakuniy natijani, balki unga olib kelgan jarayonni ham ko‘rsatmoqchimiz. Ushbu ishlar ortida aniq hisob-kitoblar, tahlil va katta jamoaning hamjihat mehnati turibdi. Eng muhim mezon esa — insonlarning xavfsizligi, qulayligi va hayotidir.

Amir Temur xiyoboni atrofida amalga oshirilgan ishlar — jamoaviy mehnat va inson manfaatiga yo‘naltirilgan yondashuvning yorqin namunasidir.