Toshkent shahar hokimligida hokim Shavkat Umurzakov Xitoy Xalq Respublikasining Chongqing Guangtian Real Estate Development Co., Ltd kompaniyasi raisi Li Tao bilan uchrashdi.

Muzokaralar davomida Toshkent hududida yirik investitsiya loyihalarini amalga oshirish masalalari muhokama qilindi. Tomonlar uzoq muddatli va strategik hamkorlikka o‘zaro qiziqish bildirdilar.

O‘zbekiston Respublikasi Prezidenti Shavkat Mirziyoyevning qulay investitsiya muhitini yaratish bo‘yicha izchil siyosati tufayli respublika poytaxti yirik xalqaro investorlarning e’tiborini tobora ko‘proq jalb etmoqda. Chongqing Guangtian Real Estate Development Co., Ltd. kompaniyasi Toshkentda ko‘chmas mulk va development sohasida keng ko‘lamli loyihalarni amalga oshirishni rejalashtirmoqda.

Tomonlar muloqotni aniq ish formatlarida davom ettirishga kelishib oldilar.

Ma'lumot uchun:

Xitoyning Chongqing Guangtian Real Estate Development Co., Ltd. kompaniyasi 2001-yilda tashkil etilgan bo‘lib, yigirma yildan ortiq vaqt mobaynida Xitoyda umumiy maydoni 5 million kvadrat metrdan ziyod bo‘lgan kompleks rivojlantirish loyihalarini amalga oshirgan.

Hozirgi kunda guruh 3000 dan ortiq mutaxassisni o‘z ichiga oladi va yetuk vertikal integratsiyalashgan tuzilmaga ega.