Istiqbol va Shahrisabz ko‘chalari chorrahasida joylashgan go‘zal, qadimiy g‘ishtin bino toshkentliklarga yaxshi tanish bo‘lib, o‘ziga xos me’moriy loyihasi tufayli oson taniladi va yodda qoladi.

O‘tgan asrning boshlarida xiyobondagi qizlar gimnaziyasi barcha qizlarni o‘qitish imkoniyatiga ega emasligi ma’lum bo‘ldi va ikkinchi qizlar gimnaziyasini qurish to‘g‘risida qaror qabul qilindi. Bino 1912 yilda Toshkentning mashhur me’mori Georgiy Mixaylovich Svarichevskiy loyihasi bo‘yicha qurildi.

1918 yilda binoda yangi tashkil etilgan Turkiston xalq universiteti joylashdi, keyinchalik u O‘rta Osiyo davlat universitetiga aylantirildi. Binoning bir qismi Fundamental kutubxonaga ajratilgan edi. 1931 yildan boshlab binoda V.V. Kuybishev nomidagi O‘rta Osiyo Iqtisodiy rejalashtirish instituti faoliyat yuritdi.

Dastlab bino ikki qavatli bo‘lgan. 1930-yillarda uning uchinchi qavati qurilgan. Guvohlarning so‘zlariga ko‘ra, uchinchi qavat qurilishi uchun Asaka ko‘chasidagi muqaddas Sergiy Radonejskiy ibodatxonasi buzilishidan olingan g‘ishtlar ishlatilgan.

Ikkinchi jahon urushi yillarida Toshkentga evakuatsiya qilingan Voronej va Kuybishev aviatsiya institutlari negizida Toshkent aviatsiya texnikumi tashkil etilgan va unga ushbu bino berilgan.

Yuriy Alekseyevich Gagarinning kosmosga parvozidan so‘ng texnikumga uning nomi berilgan. Yarim asr davomida aviatsiya texnikumi Toshkent aviatsiya ishlab chiqarish birlashmasi (TAPOiCh) va 243-sonli Aviata’mirlash zavodini malakali kadrlar bilan ta’minlagan. 2002 yilda bino O‘zbekiston Respublikasi Vazirlar Mahkamasining 2002 yil 16 yanvardagi 22-sonli “Toshkent shahrida Xalqaro Vestminster universitetini tashkil etish to‘g‘risida”gi qaroriga muvofiq tashkil etilgan Vestminster universitetiga topshirilgan.

Bino bir necha marta ta’mirlanib, qayta rekonstruksiya qilingan bo‘lsa-da, shahar aholisi quvonchiga, o‘zining dastlabki ko‘rinishini saqlab qolgan va toshkentliklarni nafis me’moriy uslubi bilan quvontirishda davom etmoqda.