Toshkentda School Bus tizimini joriy etish imkoniyatlari o‘rganilmoqda

🔺 Poytaxt maktablarida o‘quvchilarning maktabga xavfsiz va qulay qatnovini tashkil etish maqsadida maktab avtobuslari — School Bus tizimini yo‘lga qo‘yish bo‘yicha amaliy o‘rganish ishlari boshlandi.

Buning uchun, avvalo, ota-onalarning ehtiyoji, o‘quvchilarning maktabga qanday qatnashi hamda kelgusida avtobus yo‘nalishlarini shakllantirish uchun zarur ma’lumotlar o‘rganilmoqda.

📊 Ayni vaqtga qadar so‘rovnoma Toshkent shahridagi 328 ta maktabning o'quvchi soni ko'p bo'lgan va dastlabki hisob-kitoblarga School Bus tizimiga talab darajasi yuqori deb baholangan 29 tasida o‘tkazildi. Unda 58 369 nafar o‘quvchining oila a’zolari yoki vasiylari ishtirok etdi.

Dastlabki natijalarga ko‘ra, o‘quvchilarning:
— 38,5 foizi maktabga piyoda keladi;
— 33,1 foizi ota-onalari tomonidan shaxsiy avtomobilda olib kelinadi;
— 18,3 foizi avtobusdan foydalanadi;
— 5,7 foizi taksidan foydalanadi;
— 3,5 foizi metro orqali qatnaydi;
— 0,9 foizi mikromobil vositalardan foydalanadi.

🚌 Eng muhim ko‘rsatkich — so‘rovnoma ishtirokchilarining 73,5 foizi maktablar uchun maxsus avtobus qatnovlarini tashkil etish istagini bildirgan.

Mazkur natija poytaxtda School Bus tizimiga yuqori ehtiyoj mavjudligini ko‘rsatmoqda.

So‘rovnoma qolgan maktablarda ham bosqichma-bosqich davom ettiriladi. Yakuniy natijalar asosida o‘quvchilar oqimi, yo‘nalishlar, ehtiyoj mavjud avtobuslar soni, harakat jadvali, xavfsiz tushirish va olib ketish nuqtalari hamda boshqa tashkiliy masalalar batafsil o‘rganiladi.

Shundan so‘ng School Bus tizimini joriy etishning amaliy imkoniyatlari ishlab chiqilib, tegishli tashkilotlar bilan kelishilgan holda uni bosqichma-bosqich yo‘lga qo‘yish masalasi ko‘rib chiqiladi.

📌 Barcha ota-onalarni so‘rovnomada faol ishtirok etishga taklif qilamiz. Sizning javoblaringiz maktablarning School Bus ehtiyoji darajasini, undan qancha o‘quvchi foydalanishi mumkinligini, zarur avtobuslar soni va yo‘nalishlarni aniqlashda muhim ahamiyatga ega.

📝 So‘rovnomada qatnashish: @school_coddbot