Toshkentda “yashil to‘lqin” tizimining navbatdagi yo‘nalishi ishga tushirildi

Poytaxt ko‘chalarida bosqichma-bosqich joriy etilayotgan “yashil to‘lqin” tizimining yana bir yo‘nalishi Shota Rustaveli ko‘chasida — Janubiy vokzal va Grand Mir Hotel oralig‘ida ikki tomonlama ishga tushirildi.

📊 O‘tkazilgan sinov natijalariga ko‘ra:

📍 Janubiy vokzal → Grand Mir Hotel yo'nalishida
🟢 harakatlanish vaqti 11 daqiqa 30 soniyadan 8 daqiqagacha qisqardi;
🟢 qizil signalda to‘xtashlar soni 6 tadan 2 taga kamaydi.

📍 Grand Mir Hotel → Janubiy vokzal yo'nalishida
🟢 harakatlanish vaqti 12 daqiqadan 8 daqiqa 30 soniyagacha qisqardi;
🟢 qizil signalda to‘xtashlar soni ushbu yo‘nalishda ham 6 tadan 2 taga kamaydi.

📌 Natijada har ikki yo‘nalishda yo‘lga sarflanadigan vaqt 3 daqiqa 30 soniyaga yoki qariyb 30 foizga qisqardi.

🚦 “Yashil to‘lqin” qanday ishlaydi?

Mazkur tizim barcha svetoforlarda yashil signal bir vaqtda yonishini anglatmaydi. Avtomobilning yo‘lning muayyan qismini bosib o‘tishi uchun zarur vaqt hisobga olinib, har bir keyingi svetoforda yashil signalning yonishi belgilangan vaqt oralig‘i asosida sozlanadi.

Haydovchi yo‘nalishga yashil signalda kirib, belgilangan tezlik me’yoriga rioya qilgan holda bir maromda harakatlansa va transport oqimi erkin bo‘lsa, navbatdagi svetoforga yashil signal yongan vaqtda yetib boradi.

🚘 Haydovchilar uchun asosiy qoidalar

• harakatni yashil signalda boshlash;
• belgilangan tezlik me’yoriga rioya qilish;
• keskin tezlashish va tormozlashdan saqlanish;
• xavfsiz oraliq masofani saqlash;
• svetofor signallariga qat’iy amal qilish va piyodalarga yo‘l berish.

📈 “Yashil to‘lqin” tezlikni oshirish uchun emas, balki transport vositalarining yagona va xavfsiz ritmda harakatlanishini ta’minlash uchun joriy etilgan. Tizim svetoforlar oldidagi ortiqcha to‘xtashlar, chorrahalardagi navbatlar va kutish vaqtini kamaytirish, shuningdek, yonilg‘i sarfi hamda zararli chiqindilar hajmini qisqartirishga xizmat qiladi.