Шаҳримиздаги Миллий Санъат марказида “Аёллар кенгаши” Республика жамоат бирлашмаси, Микромолиявий ташкилотлар ва кредит уюшмалари миллий ассоциацияси томонидан ташкиллаштирилган «Оилавий тадбиркорликка ижтимоий кўмак» танлови ғолибларини тақдирлаш маросими бўлиб ўтди.
Тадбирда 118 нафар танлов лауреатлари деб топилган аёллар ташкилий кенгаш раиси Гулнора Каримова томонидан тақдирландилар.
Аёлларнинг микрозаём олишлари учун танлов қуйидаги йўналишларда амалга оширилди: қишлоқ хўжалиги, озиқ-овқат ишлаб чиқариш, тўқимачилик ва тикувчилик саноати, ҳунармандчиликни ривожлантириш, хўжалик ва ижтимоий хизматлар, чакана савдо ва жамоат овқатланиш хизматларини тақдим этишдан иборат бўлди.
Микрокредитлаштириш тизими лойиҳаси аёлларнинг ўз лойиҳаларига масъулиятларини ошириш ва ўз бизнесини мустақил равишда бошқариш кўникмасини ривожлантириш имконини яратади. Кичик ишлаб чиқариш корхоналари, бу – микрокредит ва заёмларга талаб манбаларидир.
Юртимиздаги кичик корхоналар бутун жаҳондаги каби маҳаллий иқтисодиётнинг муҳим бўғини ҳисобланади ва шу боис энг долзарб ва самарали бизнес-лойиҳалари ҳаётга тадбиқ этиш учун пул маблағлари ажратувчи жамоат ташкилотлари томонидан фаол равишда қўллаб-қувватланмоқда.
Лойиҳанинг асосий мақсадлари – аёллар тадбиркорлигини янада ривожлантиришга ҳисса қўшиш, кичик бизнесга ахборот ва маслаҳат кўмагини тақдим этиш, аёлларга ўз шахсий лойиҳаларини амалга оширишда кўмаклашиш, янги иш ўринлари яратиш, кейинчалик эса ҳудудларда ўз шахсий ишини юргизмоқчи бўлган тадбиркор-аёллар тизимини йўлга қўйишдир.
Танловда иштирок этиб, ғолибликни қўлга киритган аёллар учун мамлакатимизнинг йирик молиявий ташкилотлари раҳбарлари томонидан маҳорат-дарслари ўтказилиши кўзда тутилган бўлиб, у ерда аёллар бизнесни бошқариш, кредитлар билан ишлаш кўникмалари, бизнес-режалар тузиш масалалари бўйича барча саволларига жавоб олишлари мумкин бўлади. Шунингдек, Танлов ғолибларининг энг муваффақиятли лойиҳалари тақдимоти ўтказилиши кўзда тутилган.
Рухсора КАРИМОВА Тошкент шаҳар Компьютерлаштириш маркази
Олдин
