Қарши — Ўрта Осиёнинг энг қадимий шаҳарларидан бири бўлиб, ҳозирги пайтда Қашқадарё вилоятининг маркази ҳисобланади.

Милоддан аввалги II мингйиллик охири ва I мингйиллик бошлари Ўрта Осиёда қабила ва халқларнинг кенг кўламли кўчиши, илк темир даврининг бошланиш даври бўлгани билан эътиборлидир.

Ерқўрғон милоддан аввалги IX-VIII асрларда мустаҳкам қалъа сифатида шаклланган. Шаҳристондан топилган бу даврга оид буюмлар асосан сополдан ясалган пиёла, товоқ, кўза ва қозон каби идишлар бўлиб, бу идишларда кескин фарқлар кузатилмайди.

Ўрта асрларга келиб Қашқа воҳасининг янги пойтахти қулай жойда - Қашқадарёнинг чап қирғоғи бўйлаб ястанган кенг ҳудудда шакллана бошлади.

Қашкадарё маданияти ва санъати ривожида қатор омиллар, энг аввало, бу ҳудуд ландшафтининг хилма-хиллиги ва ўзига хослиги ҳал қилувчи аҳамиятга эга бўлган.

Қарши шаҳри меъморлиги Ўрта Осиё меъморлиги ривожининг умумий йўналиши асосида тараққий этган.

Қарши XX аср бошида Бухоро амирлигининг муҳим сиёсий ва маъмурий марказларидан бири бўлиб, 27 вилояти қаторида 10 та туман - амлокдан иборат эди. Қашқадарё воҳасида темир йўл қурилиши Қарши шаҳри тараққиётини анча тезлаштириб юборади.

Ўзининг 2700 йиллик тарихи давомида кўплаб воқеаларнинг гувоҳи бўлган Қаршининг ривожланиш жараёнида, унинг том маънодаги замонавий шаҳарга айланишида Ислом Каримовнинг хизматлари беқиёс.

Қарши шаҳри истиқлол йилларида ҳар жиҳатдан ривожланди, обод ва кўркам шаҳарга айланди. Халқимизнинг азалий фазилатларидан бири бўлган яратувчилик, бунёдкорлик ва ободонлаштириш ишлари истиқлол йилларида бутун мамлакатимиз қатори бу шаҳарда ҳам янгича мазмун-моҳият касб этмоқда. Шаҳар иқтисодиётида чуқур таркибий ўзгаришлар юз бермоқда.