Тошкентдаги маъмурий-ҳудудий бирлик (туман ҳокимияти Ҳусайн Бойқаро кўч., 2-уйда жойлашган). Ҳудуднинг номи тумандан оқиб ўтувчи Бектемир канали номидан олинган. 1960-73 й.лар Т. вилоятининг Ўрта Чирчиқ туманидаги Бектемир шаҳарчаси, 1973- 90 й.ларда шаҳар, 1981-90 й.ларда давлат ва жамоат арбоби Наримон Наримонов (1870-1925) номи билан юритилган. 1990 йил 27 февралдан Тошкент шаҳар тумани.
Бектемир тумани Тошкент шаҳрининг жанубий-шарқ томонида бўлиб, Катта ҳалқа йўлининг ташқарисида, асосан, Чирчиқ дарёсининг чап соҳилида жойлашган. Бектемир тумани шимолий ва шимолий-ғарбда ва Тошкент вилоятининг Қибрай тумани, Тошкент шаҳрининг Ҳамза ва Миробод туманлари, шарқда Тошкент вилоятининг Юқори Чирчиқ, жанубий-шарқда Ўрта Чирчиқ туманлари, жанубий-ғарбда Тошкент вилоятининг Зангиота ва Тошкент шаҳрининг Сергели туманлари, жан.да Тошкент вилоятининг Қуйи Чирчиқ тумани билан чегарадош. Майдони 2050 гектар, шу жумладан кўкаламзорлаштирилган майдони 0,012 минг гектар. Аҳолиси 27,5 минг киши (2009). Кўчалар сони 47 та, асосийлари: Бектемир, Оҳангарон, Ҳусайн Бойқаро, Олтинтопган. 12 маҳалла бор.
Туманда 765 корхона ва ташкилот мавжуд. 628 та кичик корхоналар ва микрофирмалар рўйхатдан ўтказилган. 65 та қўшма корхона фаолият кўрсатади: «Соса-Cola ичимлиги Ўзбекистон ЛТД» (Ўзбекистон-АҚШ), «Мармакс» (Ўзбекистон-Исроил), «Ханнури» (Ўзбекистон-Корея Республикаси), «Асклепий свифт» (Ўзбекистон-Ирландия), «Фуллонг индустриал» (Ўзбекистон-Хитой) ва бошқалар. Шунингдек, туманда 533 микрофирма, 131 кичик корхона, 135 дўкон, 243 савдо, 66 умумий овқатланиш, 101 маиший хизмат кўрсатиш шохобчалари, 4 бозор (Қўйлиқ деҳқон бозори, Қишлоқ хўжалиги маҳсулотлари улгуржи бозори, Бектемир мол, ем-ҳашак ва тирик парранда бозори, Қўйлиқ буюм бозори) бор.
Бектемир туманидаги 12 мактабгача таълим муассасасида 1598 бола тарбияланади, 5 мактабда 5540 ўқувчи таълим олади, поликлиника, касалхона ва даволаш-профилактика муассасасида (450 ўринли) 55 врач хизмат қилади. Туманда - «Фарҳод» кинотеатри, «Қуёшча нури» болалар боғи, дам олиш зонаси бор. Жисмоний тарбия ва спорт билан шуғулланувчиларга «Ниҳол» спорт мажмуаси, туман спорт мажмуаси, Гольф клуби, 9 спорт зали хизмат кўрсатади. Уларнинг 1 кунлик сиғими 6280 киши. Туманда 7,9 минг киши спорт билан шуғулланади.
Туманда Рус маданият маркази, Корейс маданият маркази фаолият кўрсатади.
Мустақиллик йилларида туманда спорт мажмуаси, маъмурий бинолар, маҳалла гузарлари, Ўрта Осиёдаги ягона Гольф клуби қурилди, кўчалар ободонлаштирилди. Бектемир туман спорт мажмуаси реконструкция қилинди. Аҳолига уй-жой қуришлари учун ер участкалари берилди.
(2009 йил 31 август)
