1. Инвестициялар ўсиш динамикаси
Республикада макроиқтисодий қулай муҳитнинг яратилиши Тошкент шаҳрида ҳам инвестицион жараёнларнинг фаоллашувига сабаб бўлмоқда.
Тошкент шаҳрининг инвестицион сиёсати янги корхоналарни ташкил этиш, мавжуд ишлаб чиқаришни модернизация қилиш ва техник қайта жиҳозлаш, ишлаб чиқариш ва ижтимоий инфратузилмани ривожлантириш билан боғлиқ. 2000-2008 йиллар мобайнида пойтахни ижтимоий-иқтисодий ривожлантиришга 5606,8 млрд сўм миқдорида инвестициялар йўналтирилган. Ушбу даврда ўрта ҳисобда қаралганда ҳар йили 107,3 фоиз ўсиш суръати таъминланган.
2.Инвестицион ресурслар тузилмасининг ўзгариши
Иқтисодиётда таркибий ўзгаришларнинг амалга оширилиши натижасида инвестицияларнинг шаклланиш тузилмасида муайян ўзгаришлар юз берди. Марказлашмаган инвестициялар улуши 40 фоиздан 83,9 фоизга етди. Давлат бюджети ҳисобига инвестициялар улуши 30,2 фоиздан 16 фоизгача, ҳукумат кафолати остида киритиладиган инвестициялар улуши 27,8 фоиздан 1,1 фоизгача қисқарди.
3. Молиялаштириш манбалар бўйича инвестициялар таркибининг ўзгариши
Инвестицион жараёнларнинг институтционал асосининг такомиллаштирилиши натижасида тўғридан-тўғри хорижий инвестициялар ва креидтларнинг роли сезиларли даражада орди. Жами инвестициялар таркибида уларнинг улуши 8,4 фоиздан 34,9 фоизгача ортган. 2008 йилда ўзлаштирилган хорижий инвестициялар ва кредитларнинг умумий ҳажми 456,7 млн АҚШ долларини ташкил этди, жумладан тўғридан-тўғри хорижий инвестициялар ҳажми 2 маротаба ортган. Корхоналарнинг ўз маблағлари ҳисобига киритаётган инвестициялар ҳажми ҳам кескин ошган бўлиб, уларнинг жами инвестициялар таркибидаги улуши 25,7 фоиздан 34,4 фоизгача ортган.
4.Инвестициялар технологик тузилмасининг ўзгариши
Инвестициялар технологик тузилмасида ҳам жиддий ўзгаришлар юз берди. Кейинги йилларда ишлаб чиқаришни модернизация қилиш ва техник қайта жиҳозлаш (машина ва ускуналар) борасида инвестицияларнинг улуши кескин ортган, хусусан машина ва ускуналарга йўналтирилган инвестициялар улуши 2000 йилда 38,8 фоизни ташкил этган бўлса, бу кўрсаткич 2008 йилда 71,4 фоизга етди.
(2009 йил 31 август)
