Юнусобод тумани 1936 йил 36 августда ташкил этилган. 1992 йил 8 май куни туманнинг тарихий жой номидан келиб чиқиб, Юнусобод деб аташга қарор қилинди. Туман пойтахтимизнинг Шимолий қисмида жойлашган бўлиб, Собир Раҳимов, Шайхонтоҳур, Чилонзор, Яккасарой, Миробод, Ҳамза, Мирзо Улуғбек ва Тошкент вилоятининг Қибрай, Тошкент туманлари билан чегарадош. Ҳудудидан Бўзсув, Қорақамиш, Анҳор, Салор каби катта каналлар оқиб ўтади. Умумий майдони 4106 гектар, аҳолиси 297,7 минг кишидан зиёд.
1966 йилда рўй берган Тошкент зилзиласидан кейин туманнинг Бўзсувгача қисмида қайта қуриш ишлари амалга оширилган бўлса, темир йўлдан нариги қисмида кўп қаватли уйлар қуришга киришилган. Ҳозирги Кичик ҳалқа йўли билан темир йўл оралиғида асосан якка тартибдаги уй-жойлар бўлган. 1983 йилда вилоятнинг туташ ерларидан бир қисми Юнусобод туманига қўшилган. Туманда айни пайтда 1107 та кўп қаватли уй, 12550 та якка тартибдаги уй-жой, 58 та маҳалла, 324 ширкат бор. Ҳудудидан 430 та кўча ўтади. Асосий кўчалари: Амир Темур шоҳкўчаси (умумий узунлиги 9 км. га яқин, пойтахтимиздаги энг катта кўча), Кичик ҳалқа йўли, Боғишамол, Шаҳристон, Аҳмад Дониш, Бодомзор, Чинобод. Шунингдек, туманда «Мустақиллик майдони», «Абдулла Қодирий», «Минор», «Бодомзор» ва «Ҳабиб Абдуллаев» метро бекатлари жойлашган ҳамда баландлиги 375 метр бўлган Тошкент телеминораси бўй чўзган.
Тарихий манбаларда «Юнусобод» номи «Юнус роботи» атамасидан олингани таъкидланади. Маълумки, ўтган асрларда шимолий юртлардан Тошкентга келган йўловчилар қамишзорлар орасидаги Алвастикўприкдан ўтишган. Агар йўловчилар кеч қолишса, бу кўприкдан ўтиш хатарли бўлгани учун ҳозирги «Юнусобод» деҳқон бозори яқинида тунашган. Бу жойда вақтинчалик роботлар пайдо бўлган. XVIII аср охири XIX аср бошида Тошкентни бошқарган Юнусхон йўловчиларга қулайлик яратиш мақсадида роботлар қурдирган. Шу тариқа Юнус роботида карвонлар тўхтайдиган бўлишган ва бу жой гавжумлашган. Бора-бора «Юнус роботи» сўзлашув тилида «Юнусобод» атамасига айланган.
Мустақиллик йилларида Юнусобод туманининг инфратузилмаси мутлақо ўзгариб кетди. Унинг кўрки-таровати кун сайин очилиб бораяпти. Бугун тумандаги «Интерконтиненталь», «Марказий», «Дедеман Силк Роуд Тошкент» каби замонавий талабларга жавоб берадиган 7 та меҳмонхонани нафақат юртимизда, ҳатто чет элларда ҳам яхши билишади.
Туман иқтисодиётини ривожлантиришга «Зенит электроникс» қўшма корхонаси, «Асбобсоз» ҳиссадорлик жамияти, «АЗН» МЧЖ, «Daichi авто Parts», «Pule Asian Marketing», «Билол Полвон», «Новофарма плюс» каби корхоналар муносиб ҳисса қўшиб келмоқда.
Тумандаги 3 та автокорхонадаги 265 та автомобиль-машина ва 105 та автобус, 17 та ёнилғи қуйиш шохобчаси, 15 та телефон станцияси, 13 та банк, 415 та маиший хизмат кўрсатиш ва 1625 та савдо шохобчалари, 3 та бозор юнусободликларнинг узоғини яқин, оғирини енгил қилаяпти.
Юнусободда 8 та шифохона бўлиб, даволаниш ўринлари сони 1992 тани ташкил этади. Уларда 2065 нафар врач, 3291 нафар ҳамшира хизмат қилади. Албатта, кўпчилик тумандаги «Чинобод» санаторийсини яхши билади. Мамлакатимизга донғи кетган бу санаторийда бир вақтнинг ўзида 450 киши саломатлигини тиклаши мумкин.
Болажонларнинг соғлом ва зукко бўлиб вояга етишида тумандаги 70 та мактабгача тарбия муассасасининг хизмати катта бўлаяпти. 40 та мактабда 41266 нафар ўқувчи 2252 ўқитувчи-мураббийдан таълим-тарбия олаяпти. Шунингдек, туманда 3 та мусиқа мактаби, 2 та меҳрибонлик уйи бор. 7 та академик лицейда 5 мингга яқин, 4 та коллежда 5 мингдан зиёд ўқувчи-ёшларга билим бериляпти, касб-ҳунар сирлари ўргатиляпти. 4 та олий ўқув юртида 17 мингдан ортиқ талаба таҳсил олади.
Маданий-маърифий тадбирлар ўтказиш, спорт билан шуғулланиш учун яратилган шароитларни бошқа туманлар билан қиёслайдиган бўлсак, бу борада юнусободликларнинг омади кулган. Мамлакатимиз кўрки бўлган «Туркистон» саройи, болажонларнинг севимли масканлари бўлган «Аквабоғ», «Тошкентленд», пойтахтимиздаги ягона ҳайвонот боғи туман ҳудудида жойлашган. Уларга мамлакатимиздаги ягона Ўзбекистон тарихи давлат музейи (жами 5 та музей), Ўзбекистон тасвирий санъат галереяси, Алишер Навоий номидаги Ўзбекистон Миллий кутубхонаси, 6 та маданият уйи, 188 та спорт иншооти, 7 та бассейнни қўшсак, туман аҳлининг ҳам маданий ҳордиқ олиши, ҳам саломатлигини мустаҳкамлаши учун ажойиб шароит бор.
«Юнусобод» теннис клуби дейилиши билан барчамизнинг қалбимизда фахр-ифтихор туйғуси жўш уради. Қисқа муддатда клуб ёнида барча спорт ташкилотлари талабларига жавоб берадиган «Ўзбекистон» спорт мажмуаси, бироз ўтиб «Универсал» спорт мажмуаси қад ростлади. Бу спорт мажмуаларида нуфузли халқаро мусобақалар, кўплаб спорт турлари бўйича жаҳон, Осиё чемпионатлари ўтказиб келиняпти.
Мустақиллигимизнинг 18 , йиллиги ва Тошкентнинг 2200 йиллиги тўйларини муносиб кутиб олиш учун туманда кенг кўламли ободонлаштириш ишлари амалга оширилди. Шундай экан, Шоштепадай қадимий археологик ёдгорлиги олам аҳли эътиборини қаратган, ҳудуддаги бири-биридан гўзал иншоот-кошоналари билан дунёга донг таратаётган меҳнаткаш юнусободликлар қутлуғ байрамларни ёруғ юз билан кутиб олишди.
“Ўзбекистон овози”
№ 108 (30.069)
05.09.09
Олдин
