Шоштепа — қадимий археологик ёдгорлик. Бу жойда милоддан аввалги VI-IV асрларда яшаган ўтроқ аҳоли турар-жойларининг қолдиқлари топилган. Милоддан аввалги 11-1 асрларда атрофи айланма девор билан ўраб олинган доира шаклидаги қалъа-қўрғон қад ростлаган. Қалинлиги 4 метрли қўрғон девори йирик хом ғиштлардан бунёд этилган. Қўрғонда шаҳарсозлик маданиятининг асосий белгиси ҳисобланган ҳунармандчилик ривожланган. Археологик қазишмалар чоғида ўша даврга оид ҳунармандчиликнинг ноёб буюмлари топилган.
Мустақиллик майдони - Тошкентнинг, Ўзбекистоннинг бош майдони. Бу жойда Мустақиллик ва Эзгулик монументи, Мотамсаро она ҳайкали, Вазирлар Маҳкамаси ва Сенат бинолари жойлашган. 1992 йилда рамзий Ер шаридаги Ўзбекистон Республикаси харитаси акс этган обида ўрнатилиши муносабати билан майдонда катта ободончилик ишлари бошланди. 2004-2005 йилларда майдонда кенг кўламли қурилиш ва ободонлаштириш ишлари давом эттирилди. Эзгулик аркаси, Сенат биноси қурилди, маъмурий бино янгича қиёфада таъмирдан чиқарилди, Бахтиёр она ҳайкали ўрнатилди, хиёбон, кўкаламзорлар, фавворалар барпо қилинди. Ўзбекистон Республикаси Президентининг 2006 йил 3 февралда қабул қилган «Мустақиллик ва Эзгулик монументи тўғисида»ги харорида бу майдоннинг мамлакатимиз ижтимоий-сиёсий ҳаётидаги муҳим аҳамияти ўзининг тўлақонли ифодасини топди.
Амир Темур хиёбони ва темурийлар тарихидавлат музейи — пойтахтимиз марказидаги қутлуғ ва кўркам маскан. Мустақиллигимиз дастлабки йилларидаёқ Президентимиз саъй-ҳаракатлари билан Амир Темур бобомизнинг мамлакатимиз ва жаҳон тамаддунига қўшган улкан ҳиссаси ўз ўрнига қўйилди. Тошкентдаги сўлим хиёбонга унинг номи берилиб, 1993 йилда улуғвор ҳайкали ўрнатилди. Шу муносабат билан хиёбонда ва унинг атрофида катта бунёдкорлик ишлари амалга оширилди. 1996 йилда уч қаватли, баландлиги 31 метр доира шаклидаги (диаметри — ташқи томони 70 метр, ички томони 50 метр) -Темурийлар тарихи давлат музейи барпо қилинди.
Хотира майдони - 1999 йилда Иккинчи жаҳон урушида ҳалок бўлган барча ўзбекистонлик жангчилар хотирасига барпо қилинган ёдгорлик. Майдон тўрига Мотамсаро она ҳайкали ўрнатилган, пойида мангу аланга ёдгорлиги ва икки чети гулзор, узунлиги 40 метр хиёбон. Унинг атрофида шарқона услубда қурилган айвонлар. Бу айвонларнинг токчаларидаги юпқа металл қатламларга шаҳид кетган барча жангчиларнинг исм-шарифи зархал ҳарфлар билан ёзилган.
«Шаҳидлар хотираси» ёдгорлик мажмуи. Бўзсув каналининг Амир Темур шоҳкўчасига туташ соҳилида мустабид тузумнинг карчалонлари буйруғи билан содир этилган мудҳиш жиноятларни кўпчилик билмасди. Ўтган асрнинг 40-йилларида бу ерда юртимизнинг миллатпарвар, зиёли фарзандларидан бир гуруҳи отиб ташланган эди. Узоқ йиллар эътиборсиз, қаровсиз ётган бу ерда Президентимиз ташаббуси билан ёдгорлик мажмуи барпо этилган. Мажмуа марказида нефритдан ишланган рамзий сағана ва унинг устида миллий меъморчилик услубида тикланган, баландлиги 27 метр бўлган гумбазли айвон бор. Ён-атрофи хиёбон ва кўкаламзор-гулзорлар. Бўзсув устига узунлиги 100 метр кўприк қурилган. Мажмуа ҳудудида бунёд қилинган
«Қатағон қурбонлари хотираси» музейи 2002 йил 31 августда очилган. Музейдан қатағончилик сиёсати даҳшатларини акс эттирган ва бу даврда қатагон қилинган фидойи юртдошларимизга тегишли ашёлар ҳам ўрин олган.
“Ўзбекистон овози”
№ 108 (30.069) 05.09.09
Олдин
