Шаҳримизнинг қайси томонидан кириб келманг улкан, маҳобатли бир минорага кўзингиз тушади. Атрофга улуғворлик бахш этиб турган бу кўркам, фусункор кошона кўлами жиҳатидан Ўрта Осиёда ягона ҳисобланган 375 метрли Тошкент телеминорасидир. Ўзининг пурвиқорлиги ва муҳташамлиги билан пойтахтимизнинг рамзий тимсолига айланган мазкур телеминора Мустақиллигимизнинг 18 йиллиги ва Тошкент шаҳрининг 2200 йиллигидек қўш байрамни алоҳида туҳфалар билан кутиб олмоқда.
—Телеминора замонавий меъморчиликнинг энг илғор усуллари асосида қад ростлаган,—дейди Тошкент радио ва телевидение узатиш маркази директори вазифасини бажарувчи Рустам Раҳимбердиев биз билан суҳбатда. -Тошкент теле-минораси Марказий Осиёда энг баланд иншоот сифатида тан олинган. Буни унинг Бутунжаҳон буюк миноралар жамиятига аъзо этиб қабул қлиниши кўрсатиб турибди. Телеминоранинг ББМЖ таркибига киргани катта маънавий ва амалий аҳамият касб этиб, бизга дунё миқёсида кўрилган ва кўрилаётган миноралар ва уларнинг фаолияти ҳақида бевосита бохабар бўлиш ва уларга юртимизни янада танитиш имконини берди.
Телеминорага кираверишда жойлашган ББМЖга бағишланган музейда эса дунё мамлакатларининг 22 та минорасининг макети ва уларга тегишли бўлган маълумотлар ташриф буюрувчилар эътиборига ҳавола этилади. Яна шуни алоҳида таъкидлаш керакки, телеминорада ташкил қилинган ушбу музей Бутунжаҳон буюк миноралар жамиятига аъзо мамлакатлар ичида ягонадир. Миноранинг асосий қисми 100 ва 200 метрни ташкил этади. 200 метрдан сўнг эса антенна қисми бошланади. Иншоотимизнинг юқори қисми да Тошкент телерадио узатиш маркази ишлаб турибди. Бу эса радио ва телеканаллар тўлқинларини ён-атрофга узатиш им-конини беради. Ва айни вақтда у орқали республика об-ҳавосини кузатиш ишлари ҳам олиб борилмоқда. Марказда барча зарурий махсус кийим-кечаклар, асбоб-анжом ва ўқув қуроллари мавжуд бўлиб, ходимлар ўртасида тез-тез тушунтириш ишлари ва ўқув йиғинлари ташкиллаштирилиб турилади. Тошкент радиотелевизион узатиш марказида амалга оширилаётганган ишларда бевосита алоқа ва ахборотлаштириш агентлигининг кўмаги ҳамда телеминорада меҳнат қилаётган ҳар бир ходимнинг хизматларини алоҳида таъкидлаб ўтиш жоиз. Теле-минорамизда сайёҳлар учун юқори даражадаги барча шарт-шароитлардан иборат қулайлик яратиб берилди. Шаҳримизнинг 2200 йиллик юбилейига муносиб coвғa сифатида катта ҳажмда таъмирлаш ишлари олиб борилди. Икки қаватли кириш мажмуасининг ишга тушиши, минорага ташриф буюрувчилар учун махсус ёпиқ йўлакнинг фойдаланишга топширилиши шулар жумласидандир. Янги қурилган бинога республика радиоэшиттириш ва телевидение маркази кўчиб ўтди. Энг муҳими, телеминоранинг архитектура қурилиши сақлаб қолинди. «Коинот» ресторани заллари байрам муносабати билан алоҳида безатилди.
Осмон қадар баландликда туриб, жаннатмакон шаҳримизни томоша қилишнинг гашти бўлакча, албатта. Шаҳримизнинг қутлуғ юбилейи муносабати билан жуда кўп мамлакатлардан меҳмонлар ташриф буюриши кутилмоқда ва уларнинг барчаси ушбу буюк иншоотимизни кўриш учун албатта, ташриф буюришади. Бинобарин, бу барчамиз учун ўзгача шараф ва ифтихордир, Дарҳақиқат, Тошкент телеминораси шаҳримиз меъморчилигида ўзига хос улкан ва бетакрор иншоотга айланиб қолди. Бугунги кунда ушбу минора нафақат техник иншоот, балки шаҳримиз кўркига кўрк қўшиб турган ноёб архитектура дурдонаси ҳамдир.
Олдин
