Ўзбекистон Республикаси Конституциясиқабул қилинганининг 17 йиллигига бағишланган тантанали маросимда Президентимизнинг маърузасини тинглар эканман, мамлакат тараққиёти, юрт саодати, ва
айниқса, келажак авлод истиқболи ҳақидаги фикрларидан қаттиқ таъсирландим.
Зеро, бугун мамлакатимизда олиб борилаётган бунёдкорликлар, ижтимоий иқтисодий соҳалардаги ислоҳотлар, маънавий-маърифий тизимдаги янгиланишларнинг замирида ҳаётимизнинг асл мазмуни — фарзандларимизнинг баркамол турмуш тарзини яратишдек мақсад мужассам. Айтиш мумкинки, 2010 йилнинг юртимизда "Баркамол авлод йили" деб эълон қилиниши, том маънода, юртимизда амалга оширилаётган ижтимоий-иқтисодий сиёсатимизнинг мантиқий давоми бўлди. Негаки, барча саъй-ҳаракатларимизнинг негизида фарзандларимизни ҳам жисмоний, ҳам маънавий жиҳатдан соғлом қилиб ўстириш, уларнинг бахту саодати, фаровон келажагини кўриш, дунёда ҳеч кимдан кам бўлмайдиган авлодни тарбиялаш орзуси туради. Кириб келаётган янги йилнинг мамлакатнинг келажаги ва умиди бўлмиш ёш авлоднинг баркамоллиги йўлидаги хайрли ишларга бағишланиши, бир томондан, ёшлар учун яратилаётган шарт-шароит ва имкониятларнинг кўламини янада кенгайтирса, иккинчи томондан, биз, устозлар учун ўз фаолиятимиз давомида янада самарали ва масъулиятли меҳнат қилиш заруратини тақазо этади.
Мустақиллик йилларида таълим соҳаси, хусусан, ўрта махсус касб-ҳунар таълимини ривожлантиришга берилаётган эътибор ҳар томонлама етук авлодни тарбиялаш мақсадини кўзлайди. Шу маънода, 2000 нафарга яқин ўқувчи таҳсил олаётган коллежимиз жамоасининг педагогик фаолияти баркамол авлодни тарбиялаш йўлидаги вазифаларни сидқидилдан бажаришга бағишланган десак, муболаға бўлмайди. Негаки, бугунги кунда ўқув жараёнига янги ахборот ва педагогик технологиялар кенг жорий этилмоқда, таълим ва тарбияда мукаммал воситалардан фойдаланилаётир. Бундан ташқари, бой моддий-техника таъминотини яратиш, жисмоний тарбия ва спорт ишларини жонлантириш, касб-ҳунар бўйича ўқувчиларнинг кенг кўникма ва малакаларни эгаллашларига ёрдамлашиш, мавжуд имкониятлардан самарали ва оқилона фойдаланиш натижасида бугунги кунда битирувчиларнинг олий ўқув юртларига муваффақиятли қабул қилинишига, мутахассисликлари бўйича ишга жойлаштирилишига эришилмоқда.
Президентимиз ўз маърузасида халқаро ҳамжамият ва тараққий топган мамлакатлар қаторига кўтарилиш учун ҳаракат қилаётган жамият, биринчи навбатда, бугун униб-ўсиб келаётган фарзандларининг ҳар томонлама баркамол авлод бўлиб ҳаётга кириб боришини ўзи учун энг улуғ, керак бўлса, энг муқаддас мақсад деб билади, дея эътироф этганларида, биз, педагогларнинг қалбимиз яна бир карра жунбушга келди. Чунки биз, устозлар фаолиятининг аксар қисми ёшлар орасида ўтади. Янада аниқроқ айтганда, ёшлар бизнинг ҳаётимиз, бугунимиз, эртамиз. Шу туфайли маърузада таъкидланган юқоридаги сатрлар биз, ўқитувчиларнинг келажак фаолиятимиз тамойилларини белгилаб олишимизда улкан дастуриламал бўлиб хизмат қилиши, шубҳасиз.
“Халқ сўзи”
2009 йил 14 декабрь
Олдин
